A FELIZIDÁ

abril 23, 2009

Cuan un diya, por fundo y reyal intrés o nomás porque no bi ha cosa ta fer n’ixe inte, se esca informazión sobre Aristóteles, Platón, etc, se puede beyer que ixa chen, chunto a atras cosas tamién muito importans, quereban saper cómo aber berdadera y funda felizidá. Platón diziba que estar goyoso yera custión de saper lebar as riendas d’os tres caballos alados que ye o cuerpo (a parti buena, a parti regular y a parti mala d’o cuerpo, alto u baxo). Aristóteles diziba que o goyo yera o chusto meyo dentre dos estremos. Séneca creyeba que remanir impasible ante as deficultaz yera o millor. No aber cosa yera lo que fazió Diógenes y, seguntes el, feba onra a la causa.

Admiro a ixa chen y creigo que toz ers han una miaja de razón. Manimenos, anque saputos en yeran muitismo más que yo, ers no tenión a oportunidá de conoixer a berdá sobre ixa custión como yo la he teníu güe. Si agora mesmo me preguntasen qué ye a felizidá, no zitarba a ixos gran filosofos. Simplamen dizirba, a felizidá ye ir ta una misa en luenga aragonesa en a parroquia de La Seo en Zaragoza y que, sin estar publizitata, se plene de chen que quiere charrar con o Siñor en a luenga d’ista tierra. Felizidá ye ascuitar a una polidisma nina cantar l’imno d’Aragón con boz anchelical y sentir como s’erizan os pelos d’os brazos entrimistanto. Felizidá ye leyer en alto en a plaza España una leutura en una luenga maltratada de traza sistematica durante muitos sieglos y que, cuan remates, a chen t’aplauda. Ixo ye a felizidá.

Anuncios